realplayer 11 شنو الحل ؟

[HaMaD]

والله مادري قلت انزل المشكلة في موضوع في مديرنا alfajrsite مرة وحدة ولا أحط موضوع يديد

المهم نزلت موضوع يديد

عندي مشكلة مو عارف إذا كانت المشكلة في المتصفح أو في real

إني ما اقدر اشغل ملفات صوتية إذا كنت استعمل النت على الخصوص

:: المشكلة :: إن الصوت يتقطع بشكل رهيب ومنرفز وشوي إلا يعيد شوي وشوي إلا مجدم بروحه وشوي إلا مشير وإلا موقف يعني حالة عويصة ولا إذا احرك المؤشر مال الصفحة انزله فوق وتحت يزيد ولا تسمع شي ونفس الشي إذا فتحت صفحة يديدة ... فصرت اضطر إذا باسمع شي اوقف شغل على النت عاد المشكلة إن ساعات ملفات يمكن تاخذ ساعة ...

المشكلة هذي طبعا ما تصيدني في المشغلات الثانية وطبعا ما كانت تصيدني في real 10 ولا تصيدني في مشغلات real في المواقع

أنا استخدم انترنت اكسبلورر 6
أتمنى إن ما تقولون لي استخدم 7 لان ما اشتهيه

[alfajrsite]

أخوي بصراحة ريل 11 أكثر نسخة فيها مشاكل بشهادة الخبراء والمبرمجين ،
وإلى يومك هذا الشركة مانزلت نُسخ تحسينية ..

آنه كانت تصيدني مثل هاذي المشاكل ، بس يوم سويت تحديث لكل الـ updates اللي بالبرنامج ، خفّت المشاكل ولكن ماختفت بالكامل ..

أيضاً إذا حدثت المتصفح بتقل مشاكل التوافق ولكن على فكرة جميع متصفحات مايكروسوفت عموماً مشاكلها كبيرة في التوافق مع أكثر البرامج .. لو تجرب مثلاً متصفح الفايرفوكس صح أنه يسد النفس شكله ، بس مشاكله أقل بوايد ..

عموماً أظن هاذي المشكلة تتعلق بالكمبيوتر وما أظن خبراء الصوت بيعرفون لها ، فأنصح تطرحها في منتديات متخصصة والله يعينك

إذا لقيت حل خبرنا عشان نسوي لك حفلة وألعاب نارية هههههههههههه



جرب متصفح غير

[HaMaD]

الله يعطيك العافية ويبارك فيك
أنا قلت مشكلة صوت لان افشل المشغلات شغالة طبيعية ما عدا الاخ real 11

جرب متصفح غير

الكلمة اللي ما كنت اتمنى اسمعها
اكسبلورر 6 حده فلة
الفايرفوكس احسه لغمصة

اسمع واحد شيقول في أحد المنتديات

اليوم وأنا أفرفر بالمنتديات لقيت برنامج بمنتهى الروعة
يضاهي الفايرفوكس والأوبرا
طبعا الأكسبلور أنتهى خلاص
بل أصبح من أردى المتصفحات وأسوأهن

بنشوف إذا احد يعرف إذا كانت المشكلة في البرنامج نفسه ويحلها لنا

وأنا باشوف السالفة ويا المتصفح لأن كل شغلي من فترة طويلة على الهيستوري و favorites يعني يبيلي شغل عشان اغيره

الله يعطيك العافية اخوي

[mo7ammed]

شوف...

الريل بلير 11 كما قال أخونا الفجر فيها مشاكل وعيوب.
فـــ أنا من صوب خبريتي ما أنصح تنصيب البرنامج ريل بلير 11 على أجهزتكم .
وإذا تبون برامج زينة ممتازه على أحسن ما يكون وحصل جوائز عالمية أنصحكم ببرامج التي وضعتها هنا

مشكلة عويصة مع تحويل الملفات إلى real media - RM ( 1 2)

بالنسبة للمتصفح على النت كسبلورر 6 ما ايده لأن فيها مشاكل فــ شوف كسبلورر 7 أو 8 ترى أحسن من إصدار 6 بوايد بغض النظر عن فاير فوكس بقول مثل ما قال أخونا الفجر

متصفح الفايرفوكس صح أنه يسد النفس شكله ، بس مشاكله أقل بوايد ..

على ما أظن أنا حاس جهازك مصاب بالفيروس لأن ما يصير المتصفح اكسبلور ينزل تحت ويروح فوق من دون ما تحكم عليه هااي أكيد فيه ينًي

وعلى حسب خبرتي يمكن جهازك مصاب بالفيروس iEplorer.exe هاي الفيروس الله يسلمك يلعب على متصفح مالك لعب يعني أتحصل أبروحه يدش النت وينزل على كيفه ويطلع ويدش في أي وقت أذيه أذيه فأنت من باب الأحتياط شيك هاي الطريقه

طريقه حذف الفايروس بدون برامج اتبع الشرح مع الصور :

1- أبدأ - ثم نختار ( بحث )

2- نختار كافة الملفات والمجلدات

3- نكتب في مربع البحث iexplorer.exe ثم نضغط على بحث

4- نبحث عن كلمة IEXPLORER.EXE.2712232.pf

5- نضلل على كلمة IEXPLORER.EXE.2712232.pf ثم خيارات - حذف

6- نذهب الى سلة المهملات Recycle Bin ونحذف الملف مره اخرى

mo7ammed

[HaMaD]

الله يعطيك العافية ويبارك فيك اخوي محمد

لا لا الحمد لله ما عندي ذي الفيروس وأنا دورت عنه من قبل وما حصلت شي

أنا أستعمل gom الصراحة أحسن مشغل مر علي كل شي يشغل ما يقول لا وفيه مميزات يقط realplayer على جنب بس بعد الواحد ما يقدر يستغني عن real

على ما أظن أنا حاس جهازك مصاب بالفيروس لأن ما يصير المتصفح اكسبلور ينزل تحت ويروح فوق من دون ما تحكم عليه هااي أكيد فيه ينًي

لا لا أنا مو قصدي المتصفح يروح فوق و تحت بروحه قصدي إذا احرك المؤشر مال المتصفح فوق وتحت تشوف مقطع الصوت يشير ويجدم ويعيد


أنا شابسوي إن شاء الله بانزل فايرفوكس وباخليه ويا اكسبلورر وباستعملهم اثنينهم كل واحد وقت الحاجة

[alfajrsite]

أخوي حمد بتسوي مثلي هههههه

أنا أستعمل المتصفحين ، وفايرفوكس أستعمله خصوصاً للمنتديات اللي فيها هاكات وايد وميزات ajax اللي تكلمنا عنها مادري وين ،، ماراح تلاقي مشاكل أبداً إن شاء الله

من عيوب الفايرفوكس إذا صفحة عريبة عريضة أحياناً ما يحط لها scroll اللي تحت فيختفي عنك المحتوى وتضطر للاكسبلورر..
وفيه عيب كبير أحياناً ما يشغل ملفات real إذا كانت على الصفحة نفسها ، بيقول لك أنه محتاج plug-in ويدوّر عليه ويقول لك ماحصلت هههههه



بالنسبة للمواقع المفضلة وغيرها ، أظن أثناء تنصيب الفايرفوكس بيعطيك خيار أنه ينسخ جميع الأمور اللي تبيها من اكسبلورر..

الله يكون في عونك

[mo7ammed]

المشاركة الأصلية كتبت بواسطة HaMaD

أنا أستعمل gom الصراحة أحسن مشغل مر علي كل شي يشغل ما يقول لا وفيه مميزات يقط realplayer على جنبl

برنامج GOM ممتاز وانا استعملته لا صراحة البرنامج ممتاز

المشاركة الأصلية كتبت بواسطة HaMaD

بس بعد الواحد ما يقدر يستغني عن real

لحد هلون تعشقون الريل بلير آآآآآه تعرف لو أنا عندي ريل بلير في جهازي عدمته

[HaMaD]

برنامج GOM ممتاز وانا استعملته لا صراحة البرنامج ممتاز

نسيت اقول إنه مجاني ويشغل flv وهو مرتاح ... ويساعدك إذا تبي تحول الفيديو إلى gif وفيه خاصية فصل خلفية الصوت مع إنه ما جربتها وايد ... باختصار فلة